昨日因為要去銅鑼灣有拍攝工作,所以便約友人去食晏,本來大家都冇idea要食咩,經過SOGO見到有個人派傳單,咁就試下啦。坐低見到個環境好光猛、乾淨,感覺都ok,由於我地差唔多2點先去食,所以唔使等就即刻有得坐低。

坐低侍應已經送上熱茶同一杯提子梳打,大熱天時就真係唔想飲熱野,所以就食下杯提子梳打,ok,酸酸甜甜都幾開胃。

我就冇睇餐牌就點左吉列豬扒飯,

吉列豬扒

我自己個飯最快到,有飯一碗,面豉湯一碗,一小碟酸菜,一小碗燉蛋及主菜吉列豬扒,上而鋪左好多碎生菜。豬扒好厚身,上菜嘅時候仲有小小煙,中間個塊佢地特登反開,咁就見到個塊仲有小小油光,睇落真係幾juicy,咁第一樣試當然係個一塊反光豬扒啦,一啖咬落去,都真係仲有肉汁係度,冇過多油,豬扒真係幾厚,好有咬口。我習慣先唔點醬汁,試下原味先,好濃嘅豬味,但係就真係冇調味料嘅味道,所以決定點個吉列汁,唔錯,好傳統嘅味道,令你開始想扒飯,酸酸地幾好味。試埋個面豉湯,有啲特別,因為裡面有好多野,有紅蘿蔔,白蘿蔔,同埋牛蒡,個味道真係好唔同,但係我比較喜歡傳統啲味。最後食個燉蛋,淡口味得制,唔係好慣。

友人1就點左吉列雜錦

吉列雜錦午餐

配菜就同我個一樣,不過佢就有炸蠔、炸魚、炸蝦同一塊炸豬柳,都好大份。佢話啲野都算好食,尤其係個隻炸蝦,好大隻同埋都好有蝦味,搞到我都好想試下,不過得一隻,同埋佢點左叫青芥未沙律汁。佢話好味過豬扒汁,下次試下先。

友人2點雜錦午餐

呢個就真係大堆頭,有飯有湯有沙律有魚生,所以佢最後係食唔晒啲飯,留番半碗到啦,魚生、沙律都好新鮮。不過真係太多,食唔晒。

最後點左一個推介小食,吉列豬柳三文冶。

吉列豬扒三文冶

呢個就真係必食推介,薄嘅吉列豬柳,用左小小芥未及一啲甜嘅醬料醃製,豬扒好滑,味道好有味,如果唔係太飽,真係想食多舊,真係全餐最好味嘅一樣野,好食到呢。

到最後都想講下侍應生嘅服務,可能我地去嘅時候已經冇咩人,我地全餐都有個人係我地附近,都會為我地加下荼,同埋加下啲碎生菜,而且都好好笑容,唔錯唔錯。呢間野可以再嚟食多次。

圖片由作者提供

此文章之主持/專欄作家介紹:Alex Tsang
《BOOK位食飯》 Alex Tsang,愛吃、愛煮、愛拍攝,最終選擇製作飲食節目為自己的「Happy Business」。只要是需要吃的人,便會為美酒佳餚而迷醉,而「有得睇、冇得食」的飲食節目,卻需要使用畫面讓人產生食慾,所以只有喜歡吃的人,才能拍攝出有質素的飲食節目。 在拍攝過大量的飲食短片之後,吃的次數多了,聽大廚們的解說多了,認識的餐飲食肆亦多了,自自然然便是朋友們吃飯聚會的 ...

版權所有©2013 創動力媒體 Dynamix