「能不能給我一首歌的時間 緊緊的把那擁抱變成永遠..」

話說,我Dear生日,於是放孖Day去大嶼山避世,人少車少,輕輕鬆鬆鄧梓峰,感覺好似去左台灣,去完之後唔想再返市區。可惜,理想歸理想,得不到也等於妄想,人總需要勇敢生存,我還是重新許願,再給我兩分鐘,讓我把記憶結成冰吧!

其中一日去左大澳遊山玩水,我地既行程係食→食→食→玩→睇風景。

事隔半年冇去je,感覺好似變左好多。唯一冇變既係……

炭燒瀨尿蝦同黃花魚春,係去大澳必食首選。平時要排好耐隊,今次一到埗,就撞正佢開舖,幸運地成為當日首名顧客。

由於大澳係漁村,所以食材一定新鮮,而且識食既一定食小辣,鮮味會更出,味道千年不變!

碳燒雞蛋仔,大澳有名食品之一。

烤出黎既雞蛋仔,真係外脆內軟,帶有「碳」既味道。每咬一下,都有雞蛋仔碎跌落地下,入面好似蛋糕,甜而不膩。

價錢雖然比坊間貴,但碳爐製比用電子模整既截然不同,至少入面唔會係空心,而且伯伯堅持用碳爐製作,蛋漿真材實料,手拎雞蛋仔模不停轉轉轉、燒燒燒,睇見都覺得攰,單係呢份手造風味、勞力, 絕對值得。

山水豆腐花,卧虎藏龍之作。除左用山水製作外,店內既糖水都係手製,唔會好甜,豆腐花顯得更清甜,同市區既豆腐花好似食糖既感覺完全係兩回事。

老闆娘仲要加薑片係糖水入面,聽聞有驅寒、驅風之效,真係好貼心呀!

食飽飽就周圍行,沿著大澳文物酒店(舊大澳警署)方向走,見到好多蝦醬曬緊,海風一吹,周圍滿佈蝦醬味,正宗漁村風味。

巧遇無賴偷舔人地既蝦醬。

直行見到少林寺,方丈份人好小器…佢冇開門。

如果你想知大澳文物酒店有咩睇,我諗會令你失望,因為星期一冇開..

淨係睇到舊大澳警署羈留房門口仔咋(現址為大澳文物酒店接待處)

唔好話你,我都好唔開心,仲爭少少走左入軍事禁地,差d俾人遺返。

返到村入面,有一間新開既大澳博物館,有好多上世紀既漁村、家庭用品、大澳黑白相展覽,由大澳某原居民自資開設,但館內禁止拍照,所以我一張都冇影,入鄉隨俗!

不過仍有一間自稱社企既店,放出衣車及裙掛供人拍照,但其他手信(名信片、筆)就貴得嚇人。

大澳既日落真係好靚。

同場加映

↓↓↓

我最期待既周杰倫演唱會呀!!!!!

好正、好勁、好型、好High、好興奮!!

唔好怪我影得差,因為我坐得好後,加上一票難求,望到個台我已經好開心。

去完大澳再睇演唱會,呢一日我真心覺得好幸福!
(希望我Dear都有同樣感覺)

可惜翌日接踵而來既工作令我既幸福變成碎片..要我怎麼撿!!!!!!!!!!?

想回到過去~~

Credits :

圖片由作者提供

此文章之主持/專欄作家介紹:卡Ka乜嘜物
一個愛吃、愛玩、愛追星、愛刺激、愛購物、愛小便宜的「肥妹」,曾經是一名售貨員,賣過靚衫、賣過化妝品、謢膚品,現在是坐在辦公室內的Small Potato。 我只有無雕飾、最真摰的文字,沒有半點假仁假意,帶你看盡天下。 喜‧怒‧哀‧樂,是我的世界,How about you!?

版權所有©2013 創動力媒體 Dynamix