記得細個去食pizza
曾經有一段時間有個叫自助沙律吧既嘢

其實佢只係俾一個兜你
跟住你就可以係出面既”吧檯”拎沙律食
而個個所謂既沙律吧, 其實只係有好簡單既沙律材料:
栗米、青瓜、罐頭什果….

而因為細個既我實在太揀飲擇食
每次行到去揀, 我都只係會揀栗米同什果食..
而生菜…只係覺得加咗落去會靚啲, 所以都只係觀賞用
(最後當然係媽媽食咗啦)

但係, 其實傳說中既自助沙律,
其實係可以疊到好高
曾經見過有人係沙律吧前好努力砌
砌到成座山先罷休….

一路都唔明點解要砌得咁辛苦呢?
雖然砌完成功感可能真係好大
食完再出去拎過未囉

直至有一次行去拎嘢食聽到個媽媽同個仔講….

只係可以拎一次咋咩????
我先知道, 原來有個咁既規矩架咩?
但係平時我再出去拎都無人阻止我既…

可惜呀….當我下次嚟既時候自助沙律吧已經係餐牌到消失咗嚕…
( 聽聞係因為啲人拎得太瘋狂所以取消咗…)

圖片由作家提供

逢星期六上載

此文章之主持/專欄作家介紹:沙沙密卡
《彩色樟木櫳》-最愛旅行、畫公仔, 迷戀舊物舊事,最好嘅拍檔係木顏色, 雖然無正式學過畫畫, 但係相信只要堅持去畫, 終有日會成為插畫家! 著作有手繪圖文書<打邊爐>

版權所有©2013 創動力媒體 Dynamix