衣櫃入面, 掛滿左一條條頸巾
長嘅短嘅四方型長方型紅色藍色黑色白色
頸巾,簡真係冬天良伴!

第一條頸巾, 相信好多人都會來自媽媽的雙手
唔知係咩呢? 我成日都覺得做得媽媽嘅都一定會識織嘢
唔識織冷衫織手套,都會識得織頸巾
我亦都曾經想跟媽媽學織頸巾
就係唔知點解學極都學唔識….算啦…我都係決定自己買算啦…

講番我條溫暖牌
因為學校只係可以帶深藍色頸巾,
所以第一條收到嘅就係呢種深藍色蝴蝶款頸巾
(因為我覺得套完出嚟好似蝴蝶)

跟住打後幾年, 媽媽每年都有織俾我
仲要係同款深藍色蝴蝶款頸巾
哈哈, 打開衣櫃, 就好似打開超人個衣櫃一樣
全部都係一樣嘅頸巾
可能佢覺得我條頸闊咗掛, 每條都會長一啲

上到中學, 蝴蝶款頸巾開始消失
買番嚟嘅頸巾越來越多
不過仲會收埋一兩條媽媽送俾我嘅溫暖牌頸巾
望住都夠晒warm!

天氣越來越凍啦, 大家準備好過冬未呀?

版權所有©2013 創動力媒體 Dynamix