細個你有幾錢零用錢呢?
你會儲起佢?你會用嚟買零食?你會用嚟買模型?

講起零用錢,其實我細個係無零用錢㗎
要買嘢食,要買文具,其實同爸爸媽媽講,佢哋就會帶我去買
當然,佢哋唔會俾我亂買啦
佢哋覺得小朋友有爸爸媽媽係身邊,根本唔需要用零用錢
但係,想自己買鍾意嘅零食,買自己鐘意嘅玩具,有邊個小朋友係唔想㗎⋯⋯

直至去到小四,機會終於嚟啦!
星期日嘅朝早,爸爸突然令咗100蚊出嚟同我哋講,你哋三個分咗呢100蚊佢啦!

當時我哋三姊弟你眼望我眼,仲怕自己計錯數,每人竟然有$33.3可以用呀!

當日下晝,就已經叫媽媽帶我哋到樓下文具鋪買嘢
想當年,麥當當都仲係賣緊廿蚊有找,三十蚊對我哋嚟講真係大數目嚟㗎!

左揀右揀,因為呢30蚊係屬於自已嘅,就將平時自己一直想買但係媽媽又唔會俾我買嘅嘢一次過買晒
30蚊,(正確嚟講係$33.3)就買咗一堆⋯⋯貼紙、紙公仔、筆盒、間尺、記事簿、筆、擦膠⋯⋯

小小嘅30蚊,係大人眼中可能係食一個晚餐嘅價錢(當年)
但係對一個小朋友嚟講就係一個天文數字,可以買好多包媽咪麵,可以買好多本美少女戰士紙公仔⋯⋯到而家我都仲好羨慕有零用錢嘅小朋友㗎!

當然,而家30蚊,對我哋嚟講真係⋯⋯連食個午餐都唔夠啦⋯⋯

此文章之主持/專欄作家介紹:沙沙密卡
《彩色樟木櫳》-最愛旅行、畫公仔, 迷戀舊物舊事,最好嘅拍檔係木顏色, 雖然無正式學過畫畫, 但係相信只要堅持去畫, 終有日會成為插畫家! 著作有手繪圖文書<打邊爐>

版權所有©2013 創動力媒體 Dynamix