「係地鐵唔睇手機!」﹣係半年前同自己許下嘅諾言。

有電話當然要聽,但係除此以外,電話永遠不在手裡,眼睛自然也向前看,「抬起頭做人」。

點解?

眾人皆醉我獨醒﹣其實係地鐵可以睇到好多人生百態,每個人嘅臉上都有一個故事,細心留意,其實精彩過動新聞或任何遊戲。做別人唔做嘅事,唔係要突出自己,而係在吸收大部份人不在吸收的,你必會比其他人有更多、更深嘅體會。

隨時有需要你嘅時候﹣見到有需要嘅人冇位坐,我會有禮貌咁請「抬唔起頭」嘅年青人讓坐。其實人係有向善嘅心,好多時候你禮貌提醒,對方係會配合嘅,最少我未試過俾人惡言相向,然後拍片擺上網。有一次我主動俾張紙巾一個勁流鼻水嘅男人,佢當然有點意外,但係都樂意接受。幫到人,自己都開心,雖然係要有點勇氣(其實係心態),但起碼你要睇到;睇唔到(或扮睇唔到),其實會錯過左好多開心嘅機會。

「放下ipad,嘗試Eye Touch」,其實係一個幾可悲嘅提醒。係機不離手嘅世代,人與人之間係冷漠左,你知,我都知,但係肯「嘗試」改變的,會有幾多個?

逢星期六上載

圖片由作者提供

此文章之主持/專欄作家介紹:Danny Chan
《讚筆絕口》-陳偉業(Danny)於澳洲修畢旅遊管理及市務學學位,回港後曾於旅遊、品牌管理、人才培訓及公共事務服務。有感社會欠缺讚賞文化,Danny於2010年創立全球首個網上讚賞平台 ﹣我讚!(www.praisage.com) ,並為機構提供專業讚賞管理服務。70後棄高薪創業,相信:成長自己為「創」,貢獻社會為「業」。

版權所有©2013 創動力媒體 Dynamix